Andados VII años del regnado del rey don Vermudo, que fue en la era de M e VI, quando andava el año de la Encarnaçión en DCCCC LXVIII, et el del imperio de Oto en XXXVIII 1, pues que Mudarra Gonçales ovo X años cumplidos fízol Almançor cavallero, cal amava mucho porquel veíe de buen seso e mucho esforçado e de buenas maneras en todo, maguer que era aún niño. Et aquel día quel fizo cavallero armó otrossí bien CC escuderos que eran de su linage dé 2, e parte de la madre, quel sirviessen yl guardassen e quel catassen por señor. Este Mudarra Gonçales sallió después tan buen cavallero e tan esforçado que, si Almançor non era3, non avríe mejor que é entre todos los moros. E porque é sabíe ya de cómmo murieran sus hermanos e de cómmo fuera su padre desonrrado e preso, dixo a sus cavalleros4 e a toda su compaña: «Amigos, vos sabedes ya cómmo mío padre Gonçalo Gústioz sufrió muy grant lazería a tuerto sin derecho, non faziendo nin meresçiendo por qué, e cómmo fueron muertos a traiçión otrossí míos hermanos los VII infantes; et dígovos, que tengo por bien de ir a tierra de christianos e vengarlos si pudiere; e de commo vos tenedes por bien de fazer í, decídmelo». Et ellos dixéronle estonçes desta guisa: «Todo lo que tú tienes por bien a nos plaze muy de coraçón, ca tenudos somos de aguardarte e de servirte e de fazer tu mandado». Et quando esto les oyó dezir, fuese para la madre, e díxol5 cómmo queríe ir buscar su padre e saber de su fazienda, si era muerto o bivo, e quel diesse la señal quel dexara por ol pudiese conosçer. E ella diol estonçes la media de la sortija quel dexara Gonçalo Gústioz. Et pues que Mudarra Gonçales la ovo tomada, fue espedido de la madre, e fuesse para Almançor, e díxol cómmo queríe ir ver su padre. E díxol Almançor que lo teníe por bien e quel plazíe. E él estonçes, espidiósse dél e de todos los otros moros poderosos, e fuesse su vía, et segúnt cuenta la estoria llevó consigo muy grant cavallería. E pues que llegaron a Salas, fuéronse para'l palaçio de Gonçalo Gústioz. Don Gonçalo, quando los vio, preguntóles quén eran. Díxol estonçes Mudarra Gonçales: «Don Gonçalo, yo nasçí en Cordova, e so vuestro fijo, e tráyovos por ende esta media sortija en señal». Gonçalo Gústioz quando vido la senyal de la media sortija, fuel abraçar, con el grant plazer que ende ovo. Mas pues que ovieron folgado en uno unos pocos de días6, dixo Mudarra Gonçales a su padre: «Don Gonçalo, yo so aquí venido por vengar la vuestra deonra e la muerte de los VII infantes, míos hermanos, e non ha mester que lo detardemos». E luego que esto dixo, cavalgaron e fuéronse para'l conde Garçi Ferrandes, e llevaron consigo trezientos cavalleros. Et pues que entraron en el palaçio ó estava el conde, desafió Mudarra Gonçales a Ruy Blásquez, e a todos los de su parte antel conde. Et díxol Ruy Blásquez que non dava nada por todas sus amenazas, e demás que non dexiesse cosa que no deviesse dezir nin mentir ante su señor. Quando Mudarra Gonçales estol oyó dezir, metió mano a la espada e fue por ferirle con ella7; mas travó dél el conde Garçi Ferrández, e non gelo dexo fazer, e sacóles treguas por tres días, ca non pudo más. Pues que esto fue fecho, espidieronse todos del conde e fuéronse cada unos para sus lugares. Mas pero non osó ir de día Ruy Blásquez a Barvadiello, e esperó la noche en que fuesse. Mudarra Gonçales sopo esto, e fuesse echar en çelada8çerca la carrera por ó el avíe de venir; et en passando Ruy Blásquez, salió Mudarra Gonçales de la çelada, e diol bozes e díxol:

«Morrás, alevoso, falso, traidor», e en deziendol esto fuel dar un golpe tan grant que lo partió bien por medio del cuerpo, e dio con él muerto en tierra. E diz la estoria que mato í otrossí XXX cavalleros que ivan con él. E desí a tiempo después de la muerte de Garçi Ferrandes, prisó a doña Lambla9, e fízola quemar, ca en tiempo del conde Garçi Ferrandes no lo quiso fazer porque era su parienta. En este año10 otrossí sacó Almançor su hueste muy grande, e vino correr tierra de christianos, e llegó fasta Coyanca, la que agora dizen Valençia, e çercóla e prosóla, e desí fízola toda astragar de cimiento. Desí tornóse para Córdova. Ese año otrossí murió el emperador Oto el primero, et regnó en pos él Oto el segundo X años.