| Or est drois que je vous devise | |
| Dou preu Enee et de sa gent, | |
| Qui par la mer s'en vont nagent | |
| Droit vers le port de Lombardie. | |
| N'estoient pas lieue et demie | |
| Loing dou port, quant uns vens lor lieve | |
| Et uns tormens, qui trop le grieve. | |
| Qui droit en Libe les mena. | |
| Bien les recoit et joie en a | 310 |
| Dido, la dame de Cartage. | |
| Eneas aime en son corage. | |
| A baron le cuidoit avoir. | |
| Son cors, sa terre et son avoir | |
| Et quanqu'ele a li abandone. | |
| Avoir peust riche corone | |
| Eneas et tenir grant terre | |
| Sans soi mouvoir, san avoir guerre, | |
| S'il deignast remaindre en Cartage. | |
| Le regne eust en mariage, | 320 |
| Mes ce n'est pas en son propos. | |
| Pour quant grant aise et grant repos | |
| Prist la, tant qu'il ait rafaitie | |
| Sa nef et sa gent rehaitie | |
| Des grans travaulz qu'ele ot eu, | |
| Puis s'en partirent san seu | |
| De la roine et de sa gent. | |
| Fuit s'ent li bers par mer nagent. | |
| Ce qu'il a lesse, e ce vait querre | |
| Qu'il n'a pas, en estrange terre. | 330 |
| Les aises lesse et les delis, | |
| Pour soi metre en mortelz periz | |
| Et de la terre et de la mer. | |
| Dido, qui trop le pot amer, | |
| Quant elle sot la departie | |
| Et com ses amis l'ot guerpie, | |
| Molt se complaint, molt se demente: | |
| Ains mais de feme plus dolente | |
| Ne fu ne ja mais n'ert parle. | |
| De triste cuer et adole | 340 |
| Souspire la roine et plaint. | |
| De son faulz ami se complaint: | |
| 'He, faulz traitres et mauves, | |
| Bien voi que sans retor t'en ves, | |
| Fel parjures, par foi mentie, | |
| Tu m'avoies ta foi plevie | |
| Que ja vers moi ne fausseroies | |
| Ne pour autre ne me leroise: | |
| Or me lesses pour autre querrre. | |
| Mon cors et m'amour et ma terre | 350 |
| T'avoie mis en abandon; | |
| Ou trouveras tu mais tel don, | |
| Si vaillant ne si acceptable? | |
| L'on selt dire un mot veritable: | |
| Que feme a le cuer trop braidif | |
| Qui d'ome d'estrange pais | |
| Fait son acointe ne son dru. | |
| Pour toie acointance ai perdu | |
| Mon cors e m'ame e m'onor: | |
| Or sui livree a deshonor! | 360 |
| A villement m'iert et hontage, | |
| Quant oncques pris par mariage | |
| Un tel hom estrange et fuitis | |
| Un esgare povre et chetif, | |
| Mes oncques nel lessai por honte: | |
| Amans ne set que honors monte! | |
| Roy te fis de grant seignorie; | |
| Or m'as deceue et raie | |
| Si velz une autre decevoir. | |
| Je ne quit pas, au dire voir, | 370 |
| Que tu truisses legierement | |
| Feme de si grant tenement. | |
| Se tu la tures ne croi je mie | |
| Qu'el te soit si loiaulz amie! | |
| He las! Je l'aim outre mesure! | |
| Pour s'amour sens au cuer l'arsure | |
| Qui plus art que souffres espris. | |
| Trop a li faulz vers moi mespris | |
| Et meserre de moi trair, | |
| Mes ne le puis pour riens hair, | 380 |
| Soi ne s'amour metre en oubli, | |
| Ne je ne puis penser qu'a li, | |
| Mes de sa traison me plaing, | |
| Et quant plus me grieve plus l'aing | |
| Et plus sui de s'amor esprise. | |
| Puis que je voi qu'il me desprise | |
| Trop me fait s'amour traveillier, | |
| Souspirer et plaindre et veillier | |
| Sans repos prendre et sans sejor. | |
| Mes malz n'apaise nuit ne jor. | 390 |
| Trop est mes cuers en grant destroit. | |
| Pour lui m'estuet trampler sans froit | |
| Et puis suer san avoir chaut. | |
| Lasse, dolent, il ne l'en chaut! | |
| De moi ne de m'amor n'a cure! | |
| Trop est de diverse nature! | |
| Ja ne me face a croire nulz | |
| Qu'il oncques fust filz de Venus: | |
| Il ne li religne de rien! | |
| Il a cuer plus dur de merien! | 400 |
| Ains fu filz de beste sauvage! | |
| Trop a le cuer dur et volage | |
| Et plus orageus de la mer! | |
| Pour quoi le puis le tant amer, | |
| Quant il ne m'aime ne me prise? | |
| Il me het tant qu'il en desprise | |
| Sa vie por despit de moi. | |
| J'ai, voir, grant doute et grant esmoi! | |
| Por la tempeste et pour le vent, | |
| Qui si le guerroie souvent, | 410 |
| A il ceste mer esprouvee | |
| Horrible et fiere l'a trouvee | |
| Et mains damages li a fais, | |
| Mes or fust quoie et bien a pais | |
| Et les vens fussent apaiez, | |
| Si devroit il estre esmaiez | |
| Et doutans qu'il ne li meschiee | |
| De ce qu'il a sa foi trichiee! | |
| Bien l'en devroit malz avenir | |
| Et perilz et perte venir, | 420 |
| Et bien porroit en mer noier. | |
| Ja Diex ce ne vueille otroier | |
| Que ja pour ochoison de moi | |
| Li mesaviegne! Je m'esmoi | |
| Assez plus de lui qu'il ne fait. | |
| Tout m'ait li tricherres mesfait, | |
| Ne vueil je pas que malz li viegne, | |
| Mes je pri Dieu que il reviegne | |
| Por remaindre o moi toz jors mais | |
| Et, s'il ne velt, huit jors ou mais | 430 |
| Devroit il au mains sejorner, | |
| Tant qu'il eust fait atorner | |
| Sa nef, que li vent on quassee, | |
| Et la torment fust passee. | |
| Quant la tormente cessera, | |
| Se velt, si s'en retornera, | |
| Mes la demore me pleroit! | |
| Ja mais mon vueil ne me leroit, | |
| Mes je voi bien c'est por noiant. | |
| Il veult miex aler foloiant | 440 |
| Par mer qu'estre o moi assejor. | |
| He lasse, tant mar vi le jor | |
| Ou Fortune ca l'amena, | |
| Ou mes folz cuers tant me mena | |
| Que je m'amour l'ai otroiee. | |
| Tant vaillant home m'on proiee, | |
| Riches de terres et d'avoir, | |
| C'ains ne porent m'amor avoir, | |
| Et grant despit en on eu | |
| Quant pour cest, c'onc mais n'oi veu, | 450 |
| Les refusai come esbahie. | |
| Or m'a li desloiaus traie, | |
| Mes ce n'est pas la premeraine: | |
| Ausi trahi, j'en sui certaine, | |
| Sa fame, la mere Yuli, | |
| Qui morte est por defaut de li. | |
| Je meismes por lui morrai: | |
| S'il ne revient, je m'occirai | |
| De son branc, dont il me fist don. | |
| Bien doi avoir tel guerredon | 460 |
| Dou service que li ai fait! | |
| Ensi vait de bienfait col frait! | |
| Mes'Eneas au cuer volage | |
| Ne me deigne par mariage | |
| Retenir et tant ne m'a chiere, | |
| Si me retiengne a chamberiere: | |
| Il ne me chaut que que je soie, | |
| Dame ou serve, mes que je l'oie, | |
| Et s'il ne deigne revenir, | |
| Ma vie estuet par temps fenir, | 470 |
| Mes seule ne morrai je mie: | |
| Il me laist rosse et empreignie | |
| D'un enfant qu'il a engendre.' | |
| Adont fist esprendre un grant re. | |
| Une suer ot Dido molt bele: | |
| Anne avoit non la demoisele | |
| Qui mot avoit grant duel au cuer | |
| Pour la destresce de sa suer. | |
| Molt volentiers s'ele poist, | |
| La reconfortast et joist, | 480 |
| Mes reconfors n'i a mestier: | |
| Onc ne la sot si bien guetier | |
| Anna qu'el ne se soit occise | |
| Dou branc Enee et ou feu mise. | |
| En la re s'est Dido gitee: | |
| Deceue iere et baretee | |
| Si redecut et bareta | |
| Ses gens, quant ou feu se git. | |
| Tost fu ses cors ars et espris. | |
| Ensi li est de s'amour pris. | 490 |
| Anna sa suer grant duel en a. | |
| Dou grant duel qu'ele demena | |
| Ne vous vueil pas long conte faire. | |
| Pour soie amour se volt desfaire, | |
| Mes les dames ne li lessierent | |
| Ne li baron, qui l'apaisierent. | |
| Grant duel font tuit cil de Quartage. | |
| Plorent la perte et la damage. | |
| Regretent la france roine, | |
| Qui tant estoit de bone orine, | 500 |
| Sage, vaillans, preuz et doutee, | |
| S'amors ne l'eust assotee. | |
| Molt fesoit la dame a douter | |
| Et molt iert sage et bien aprise | |
| Et mot estoit de grant emprise, | |
| Ains qu'amours sorprise l'eust. | |
| Sor tout le mont, s'il li leust | |
| Et s'amours ne l'eust traie, | |
| Cuidoit avoir la seignorie. | 510 |
| Bien cuidoit fere chief et mestre | |
| Dou monde, se ce peust estre, | |
| Cartage sa noble cite, | |
| Qui n'iert mie d'antiquite: | |
| Nouvelement l'avoit fondee. | |
| N'estoit pas de ce pais nee: | |
| De Tyr ert, dont el fu roine, | |
| Mes ses freres de male orine | |
| L'en ot desiretee a tort | |
| Et son seigneur Sicheus mort. | 520 |
| Foui s'en de cele contre. | |
| Quant terre avoit puis conquestee, | |
| Qui par lui n'ert puis maintenue, | |
| Morte est a grant desconvenue | |
| Por fole amor desmesuree, | |
| Qui l'ot sorprise et embrasee. | |
| Puis que sainte Yglise e sa gent | |
| Ot tant coru par mer nagent, | |
| C'est par les fluctuacions | |
| De diverses temptacions, | 530 |
| Qu'ele ot passez les deus perilz, | |
| Qui mains orent mors et perilz, | |
| C'est les tormens et les corages, | |
| Les grans anuis et les outrages | |
| Que folz Juis et folz paiens | |
| Li firent, qui mains crestiens | |
| Mistrent a dolereus martire, | |
| Dont maint se lessierent afflire | |
| Pour crestiente maintenir, | |
| Quant sainte Yglise dut venir | 540 |
| Au port de voire cognoissance, | |
| De foi et de voire creance, | |
| Et qu'el n'estoit pas long de port | |
| De vie et de joieux depart, | |
| Uns vens treboilloneus leva, | |
| Qui sainte Yglise trop greva: | |
| C'est vens de discorde et de doute, | |
| Qui sainte Yglise chace et boute | |
| En terre seche et areneuse, | |
| Pulverulent et sabloneuse, | 550 |
| C'est en gent plaine de fallace | |
| Et de fraude et de roide grace, | |
| Sans toute humoistour de doctrine | |
| De saluable discipline. | |
| La les retrait et joie en ot | |
| Heresie, qui se penot | |
| De sainte Yglise destorner, | |
| Qu'el ne peust mes retorner | |
| Au port ou elle estoit meue, | |
| Et tant ert rote et dissolue | 560 |
| La crestientez et la fois | |
| De sainte Yglise a cele fois, | |
| Que mais resorder ne peust, | |
| Se Diex rejointe ne l'eust | |
| Par ses sains, qui tant charpenterent, | |
| Tant escristrent, tant desputerent, | |
| Que par convenables raisons, | |
| Par escrips, par desputoisons, | |
| Fu auques la nef rafetie | |
| En crestientez rehetie. | 570 |
| Molt estoit lors dame Heresie | |
| Haute roine et bien prisie, | |
| Et moult avoit grant tenement, | |
| Et seignorissoit hautement | |
| En mains leus, et tant cuida faire | |
| Que toutes gens peust atraire | |
| Et sousmetre a sa mescreance, | |
| A s'errour et a sa doutance, | |
| Et tout le monde decevoir, | |
| Mes Diex, qu'ele cuidoit avoir, | 580 |
| Foi sa fole compaignie, | |
| Lessa la grosse et empreignie | |
| Dou propos qu'ele avoit eu | |
| Et par fole errour conceu, | |
| Mes ses folz pensers la decut, | |
| Quar mauves loier en recut, | |
| Qu'el s'occist spirituelment | |
| Dou branc dou devin jugement, | |
| Ne li cors ne fu mie cuites, | |
| Quar des bougres et des herites | 590 |
| Fu arse la plus grant partie, | |
| Et sainte Yglise est revertie | |
| Au propos don resortie iere, | |
| Si vint a droit chemin arriere, | |
| C'est a la droite cognoissance | |
| De foi et de voire creance. | |
| Morte est la dame de Cartage | |
| Por sa folie et pour sa rage | |
| D'amours, dont elle estoit esprise | |
| Pour Eneas, qui l'a desprise | 600 |
| Et de lui s'en fui en emblee, | |
| En larrecin, en recelee. | |
| A grant esploit s'en vait nagent | |
| Par haute mer, il et sa gent | |
| Et tant on lor chemin tenu | |
| C'au siege Erix sont revenu. |