. . . . . . . . . .

(lines 1-262 omitted)

Ansi ont li fuitis de Troie

Sofert trois jors, qu'il n'orent joie;

Quant vint al quart, qu'il ajorna, 

265

Li vanz failli, del tot cessa,

Li solaus lieve, ne plut mes,

Del tot remest la mer an pes;

Asoagiee est la tenpeste.

Dont leva Eneas la teste

270

Et esgarda devant son vis,

Se vit de Libe lo pais.

Toz rehaite ses compaignons;

Nagent a fort as avirons;

Tant ont nagie et tant sigle

275

Qual port de Libe sont torne.

Issu sont fors com plus tost porent;

De lor vint nes que set nen orent;

Celes atachent el rivage.

Lo pais trovent molt salvage;

280

Ne voient borde ne meison

Ne borc ne vile, se bois non;

Mes que que soit, formant lor plaist.

Eneas vet an la forest;

Uns sols meschins ala o lui,

285

Lors ars porterent anbedui,

Et cers et bisches on berse:

Si home an ont asez porte.

Les feus alument el gravier,

Si apresterent lo mangier,

290

El bois lo pristrent liement.

En la mer gardoient sovant

S'il poissent lor nes choisir

Que li vanz ot fet departir;

De caus estoient curios,

295

Mais molt furent puis correcos

De caus que il virent noier,

Dom il n'atandent recovrer:

Es autres on graignor fiance,

Mes es morz n'ont point d'esperance.

300

Sor les faloises vont garder

Ses verroient loing an la mer;

Quant nes voient, si ont grant dote

Que mers parfonde nes tranglote.

Donc a Eneas asanble

305

Caus qui o lui sont arive;

Nan i ot de sa compaignie

Ne mes que la tierce partie;

Caus comanca a conforter

Des maus qu'il orent an la mer.

310

'Seignor,' fait il, 'franc chevalier,

Ne vos devez mie esmaier

Se vos avez eu peor

An ceste mer, mal et dolor;

Ca avant vos delictera,

315

Quant il vos an remembrera;

Buen vos sera a reconter

Les maus qu'avez eu an mer.

Huen qui s'esmuet an altre terre

Por regne et por pais conquerre,

320

An grant enor ne puet venir,

S'il bien et mal ne puet sofrir.

Qui toz tens a sa volante

N'onques n' mal espermante,

Ce m'est avis, ja ne savra

325

A negun jor que bien sera;

Mais se il sofre un poi mesaise,

Qu'il nen a tot ce que li plaise,

Ce m'est avis, molt prisera

Le bien apres, quant il l'avra.

330

Or avons molt sofert ahanz

Par plusors mers plus de set anz

Et molt i avons travaillie

Et molt geune et veillie;

S'avons ja mes de repos rien,

335

Molt nos plaira auques de bien.

Sofrant travail et mal et poine,

Si com fortune nos demoine,

Nos conduiront li de ou leu

Que il nos ont promis an feu,

340

Au Lombardie la Maior;

D'iluiec furent nostre ancessor.

Grant gent somes et si n'avon

De vitaille se molt po non;

Il nos estuet garison querre,

345

Mais molt voi ci estrange terre;

Ne sai se onques i ot ble,

Ne borc ne vile ne cite;

Unques plus salvage ne vi.

Se del vivre ne trovons ci,

350

N'i a noiant del sejorner,

Mais del metre nos an la mer,

Et requeron autre contree.

O vitaille soit mialz trovee,

Eve dolce, foin et avein

355

As chevals qui vivent a poine.'

Atant Eneas a choisiz

Dis chevaliers proz et hardiz,

Qui lo pais aillent cerchier

Et se li sachent renoncier

360

An quel pais sont arive,

Se home i a ne grain de ble.

D'iluec tornent li mesagier,

Qui la contree vont cerchier;

Errent pars vals e par montaignes,

365

Par boschages et par champaignes;

Tant on erre, ne virent on

Qui lor saust randre raison,

Rien qui vesquist, nes salvagine.

Tant ont erre par la gaudine

370

Qu'il antrerent en un santer;

De cel ist un chemin plener.

Li mesagier on tant tenu

Lo grant chemin, qui larges fu,

Cartage virent, la cite,

375

Dont Dido tint la fermete.

Dame Dido tint le pais;

Miaus nel tenist quens ne marchis;

Unc ne fu mais par une feme

Mielz maintenu enor ne regne.

380

D'icel pais n'ert mie nee,

Ainz ert de Tire la contree;

Sicheus ot a non ses sire;

Uns suens frere lo fist occire,

En essil chaca sa seror,

385

Por ce qu'il volt avoir l'enor.

Cele s'an est par mer foie;

Molt ot grant gent en compaignie,

Porte an a molt grant tresor,

Pailes et dras, argent et or.

390

An cel pais est arivee;

Au prince vint de la contree,

Par grant angin li ala querre

Qu'il li vandist tant de sa terre

Com porprendroit un cuir de tor,

395

Done l'an a argent et or;

Et li princes li otroia,

Qui de l'engin ne se garda.

Dido trancha par correetes

Lo cuir, qui molt furent grelletes;

400

De celes a tant terre prise

C'une cite i a asise;

Puis conquist tant par sa richece,

Par son angin, par sa proece,

Que ele avoit tot le pais

405

Et les barons a soi sozmis.

Sa cite avoit non Cartage,

En Libe sist sor le rivage.

La mer l'i bat d'une partie,

Ja par de la n'iert asailie;

410

De l'autre part sunt li viver

Et li marais grant et plener

Et grant fossez a barbacane,

Fair a la guise libicane,

Et trenchieez et plaisseiz,

415

Cengles, barres, pont torneiz.

Ainz que l'an viegne an Cartage,

A maint destroit et maint passage.

El coig amont devers la rive

Ot une grant roche naive;

420

Iluec sont li mural assis.

Li carrel sont de marbre bis,

De blanc et d'inde et de vermoil;

Par grant anging et par consoil

I sunt asis tot a compas;

425

Tuit sont de mabre et d'adamas.

Li muir sont fait a pastorals,

A pilerez et a merals,

A bisches, a oisiaus, a flors;

O le marbre de cent colors

430

Sont painture defors li mur,

Sanz vermeillon et sanz azur.

Tot anviron ot fet trois rans

De mangnetes par molt grant sens

D'une pierre qui molt est dure;

435

La mangnete est de tel nature,

Ja nus hom armez n'i venist

Que la pierre a soi nel traisist:

Tant n'an venissent o halbers,

Ne fussent sanpre al mur aers.

440

Li mur erent espes et halt,

Qui ne criement negun asalt;

Cinc cenz torz avoit anviron

Estre lo demoine donjon;

Devers la vile erent trifoire

445

Li mur, a ars et a civoire,

O granz pierres de marbre toz.

Li chemins alot par desoz;

Grant marchie i avoit toz dis;

La vendoir an lo vair, lo gris,

450

Coltes de paile, covertors,

Porpres, pailles, dras de color,

Pierres, espices et vaiselle;

Marcheandie riche et bele

I pooit l'an toz tenz trover;

455

Ne se poust hom porpenser

De richece que el mont fust,

Dont en cel leu plante n'eust.

Granz rues ot an la cite

Et pales riches a plante,

460

Borjois menanz, sales et tors

Et aleors et parleors;

Bels menages a grant plente

Ot la dedanz an la cite.

Set mestres portes i avoit;

465

Unz cuenz sor chescune manoit,

Lor fie an tienent et lor terre;

Se a Cartage sordoit guerre,

Chascun conte estovroit servir

Et set cenz chevaliers tenir.

470

En cele mer joste Cartage,

Iluec prent l'an, a cel rivage,

D'une maniere pesonez,

Ne gaires granz, mes petitez;

L'en les taille sor les coetes,

475

Si an chient roges gotetes;

De ce toint l'an la porpre chiere.

Pou sont peison de lor mainiere;

L'an les nome conciliums.

Del sanc de ces petiz peisons,

480

Dunt iluec avoit a mervoille,

De ces ert la porpre vermoille;

Les noires refont an Cartage

Del sanc d'un grant serpant evage,

Que l'en apelle cocadrille,

485

Dunt molt a iluec an une isle;

Serpanz sont granz a desmesure

Et de molt diverse nature;

Quant a sa proie devoree,

Donc si s'endort gole baee;

490

Il nen a noiant de boiel;

El cors li antrent li oisel

Et pasturent an son dormant

Ce que mangie ot de devant;

Ne s'espurge pas altrement,

495

Car n'a mie de fondement.

A une part de la cite

Asist Dido sa fermete;

Torz i ot forz e bon donjon,

Qui ne criement se foldre non;

500

N'i peust rien nus hom forfaire,

Por nul asalt, lancier ne traire,

Ne engin ne li forfeist

Se devers lo ciel ne venist.

Li pales fu desoz la tor;

505

Onc a roi ne enpereor

Ne fu si buens veuz ne talz.

De chieres pieres naturalz

Ot un mui enz el mur asis,

Et set mile esmalz i ot mis

510

Es pilers, es antailleures,

Es oiseries, es volsures,

Es columbes, es fenestriz,

Es verrines et es chasiz.

Un tenple fist anpres Dido,

515

Ou costivee estoit Juno;

Molt estoit riche a desmesure;

Enuiz seroit de sa faiture

A dire tot ce qu'en estoit.

La deesse Juno voloit

520

Que Cartage fust chies del mont

Et li realme qui i sont

A li fussent trestuit achin,

Mais onques n'i pot metre fin;

Tot autrement est destine,

525

Car li deu orent esgarde

Que a Rome l'estovoit estre.

Li Capitoilles sist a destre,

Fors del chastel a une part,

Ou fussent par comun esgart

530

Li senator mis por jugier,

Por tenir droit, por tort plaissier:

Ce fu leus a tenir les plaiz.

Par merveillos angin fu faiz;

Molt fu biaus et larges dedanz,

535

Voltes et ars i ot dous cenz;

Ja n'i parlast hom tant an bas,

Ne fust oiz eneslopas

Par tot lo Capitoille entor.

Li vint et quatre senator

540

I estoient ja esgarde.

Puis ot Rome la poeste,

D'iluec a molt lointaing aage,

Que Dido volt metre an Cartage.

Encor idonc ne par ert mie

545

Cele cite tote fornie,

Encor faisoit Dido ovrer

As murs entor por miauz fremer.

Tant esploitierent li mesage

Que il antrerent an Cartage;

550

Il unt anquis et demande

Qui maintenoit cele cite.

L'en lor a dit que une fame

Estoir dame de tot lo regne.

Il ont anquis ou ele estoir;

555

Par andices alerent droit.

Sus el chastel desoz la tor

Troverent ja al palleor

La raine o tot grant barnage.

Devant li vienent li mesage.

560

Ilioneus parla permiers,

Qui molt estoit sages et fiers;

Salua la, puis se li di:

'Antan a nos, dame, un petit.

Bien as oi, ja a lonc tens,

565

Que Greu furent vers Troiens;

Astrent la vile et trebucherent,

Granz et petiz toz cravanterent;

De ces qu'il an porent tenir

N'an pot uns sols de mort garir:

570

Tote ont la cite essilliee.

De la celestial ligniee

Ot an Troie un riche baron;

De cele grant ocision

Qu'i feisoient la nuit li Greu,

575

Lo grantierent bien li deu;

Fors lo mistrent de la cite;

Grant gent ot o lui asanble.

Par lor comandement vait querre

Itaille, un loigtaine terre;

580

Quise l'avons set anz par mer,

Ne la poons ancor trover.

Tormant aumes grant l'altr'ier;

Une de noz nes fist plongier,

Les homes noier an veismes

585

Et des altres nes deperdimes

Grant partie, si ne savon

S'il sont ancor noies ou non.

La menor part est arivee

Molt pres de ci en ta contree;

590

Eneas iluec est remes,

Ou il atant ses autres nes;

Ca nos an a a toi tramis,

Que soit segurs an ton pais,

Qu'il nen ait garde de ta gent,

595

Tant que il ait ore et vant,

Et ses nes alques redrecies,

Que la tormante a depecies.'

Dido respondi al mesage:

'Bien sai,' fait el, 'lo grant domage

600

Et lo destruit des Troiens;

Ge l'ai oi molt a lonc tens.

Vos qui de cel estes gari

Molt l'avez puis espenoi;

Onc puis ne fustes sanz dolor,

605

Mestier avez grant de sojor.

Se vos volez ci sejorner,

Voz nes restroindre et ratorner,

N'avez garde, gel vos plevis,

D'ome qui soit an cest pais;

610

Segur soiez, ne dotez pas.

Se ca volt venir Eneas,

Gel servirai an ma cite,

Li mien li ert abandone.

Ge refui ja plus esgaree,

615

Quant ge ving an ceste contree,

Car ne sui pas de cest pais;

Par moi lo sai, bien l'ai apris,

Que ge doi bien avoir pitie

D'ome, sel voi desconsoillie.

620

Se sejorner volt Eneas

Et demorer ci a trespas,

Ja mar i despandra denier

Por rien nule dont ait mestier;

Tot lo ferai del mien servir

625

Et molt li donrai al partir;

Plus li ferai que ne vos di.

S'an fin voloit remaindre ci,

Et s'i laissast ester atant

La folie qu'il va querant,

630

De ma terre ait une partie

A lui et a sa compaignie;

Ma gent et la soe soit une;

Se il velt avoir ma comune,

N'avrai plus chier le Tirien

635

Que jo avrai lo Troien.

Tornez a lui tost al rivage,

Et dites li que an Cartage

S'an viegne o moi herberger;

Toz est lassez de navier.'

640

Li mesagier ont pris congie,

A lor seignor s'en vont tuit lie.

Eneas de bien loin les vit,

Contr'els ala et se lor dit:

'Qu'avez trove?' 'Nos bien.' 'Et coi?'

645

'Cartage.' 'Parlastes al roi?'

'Nenil.' 'Por coi?' 'N'i a seignor.'

'Coi donc?' 'Dido maintient l'enor.'

'Parlastes vos o li?' 'Oil.'

'Menace nos?' 'Par foi, nenil.'

650

'Et que dist donc?' 'Promet nos bien,

Soiez segurs, mar crembroiz rien.

Ce dit la dame Tiriene,

S'an ceste terre Libicaine

Volez remaindre et sejorner,

655

Voz nes restroindre et refermer,

Ne vos estuet doter de rien,

Car el vos aseure bien;

Par nos vos ofre lo sejor

Ansanble li anz an sa tor;

660

Ses servises ne vos faldra,

Tant com prandre lo vos plaira.'

Dementre que li mesagier

Alerent lo pais cerchier,

Furent lor nes al port venues,

665

Qu'il quidoient avoir perdues.

A ancree s'i ert chascune;

Totes i erent ne mes une,

Qu'il perdirent par la torment,

Qui en terre n'orent nulle atente.

670

Eneas formant s'esjoi

De la novele qu'il oi,

Et de ses nes qu'il ot fors une.

Molt li estoit propre fortune:

Fortune lo ra esbaudi,

675

Qui de devant l'avoit marri.

Por ce ne doit hom desperer,

Se lui estoet mal andurer,

Et se il ra tot son plaisir,

Donc ne se doit trop esjoir,

680

Ne por grant mal trop esmaier,

Ne por grant bien trop deslier;

Et d'un et d'el, de tot mesure;

Uns biens, uns mals toz tens ne dure.

Fortune torne en molt po d'ore,

685

Tel rit al main qui al soir plore;

Al soir est laide, al matin bele,

Si com el torne sa roelle;

Cui al met a l'un jor desus,

A l'autre lo retorne jus:

690

De tant com el l'a mis plus halt,

Tant prant il aval graignor salt.

Eneas dist a ses barons

L'ofre a la dame et lo respons,

Et ce que el li a mende:

695

Que alt a li en sa cite.

Cil li loent comunaument

Qu il i aut hastivement,

Et alsi fist, ne tarda pas.

Molt se conrea bien de dras

700

Et monta an un palefroi;

Set vinz an fist monter o soi,

Et chevalcha droit vers Cartage,

Si com lo moinent li mesage

Qui devant i orent este.

705

Ainz none vint an la cite.

Si home vont de devant lui

Et chevalchoient dui et dui;

Borjois, dames et chevaliers

Et an rues et an soliers

710

Les vont a mervoille esgarder.

N'estovoit mie demander

Qui de la compaignie ert sire:

Sanz ce que nus d'als l'oist dire,

Conoissoient trestuit lo roi.

715

Chascun lo mostre a l'autre al doi;

Molt estoit bials et avenanz

Et chevaliers forniz et granz;

A toz an sanble lo plus bel.

Il ala descendre al chastel;

720

Contre lui est Dido venue;

Il vait avant, si la salue.

Ele lo prist par la main destre;

An l'antaille d'une fenestre

Se sont loing des autres asis;

725

El li a de son estre anquis,

Et il l'en a grant conte fait,

Come il erre et com il vait.

Quant il li ot tot aconte,

Son chambellan a apele,

730

Ariere l'anvoia as nes

Por son fil, qui la ert remes;

Molt tost l'i rova amener

Et comanda a aporter

Trois garnemenz que il avoit;

735

Porpansa soi qu'il les donroit

A la raine de Cartaige,

Qui molt li faisoit bel ostage.

Une nosche i ot mervoillose,

Unques ne fu plus preciose,

740

Et un mantel qui molt fu chiers;

La penne en fu a eschaquiers,

D'unes bisches de cent colors;

D'autres plus riches et meillors

Fu bien orlez li mantiaus toz

745

Devant et a porfil desoz;

Molt fu chiere la forreure

Et molt valut mialz la volsure:

Toz fu batuz a or defors;

Sol li atache et li mors

750

Et li boton et li tassel

Valoient plus que troi chastel.

Tel vestement iluec avoit

Com a raine convenoit;

De porpre estoit, estelez d'or.

755

Li rois Prianz an san tresor

Fasoit cez garnemenz garder,

Quant il se devoit coroner;

Sa fame Ecuba les avoit

Lo jor que coronee estoit.

760

Tornez s'an est li chambellans,

Tot accompli en po de tans,

Si com ses sires li ot dit.

La mere Eneas sot et vit

Que ses fiz estoit an Cartage;

765

Molt redotoit an son corage

Qu'il nel menassent malement:

Molt ert antre salvage gent.

Ele ot d'amor la poeste;

Quant vit que son fil ot mande,

770

Soef antre ses braz lo prent,

Molt lo baisa estroitement;

An cel baisier li a done

De faire amer grant poeste:

Qui anpres li lo baisera

775

Del feu d'amor espris sera.

A cels quil meinent dist Venus

Qu'ons ne fame nel baisast plus,

Fors la raine et Eneas.

Il s'an tornent eneslopas.

780

Ascanius o son barnage

A son pere vint an Cartage;

Cil que l'avoit fait aporter

A Dido lo fait presanter.

O granz graces a receu,

785

Tint le don que riches fu;

Por sa valor tant nel prisa,

Com por celui qui li dona.

La dame et tuit li Tirien

Virent lo don al Troien;

790

A mervoille le prisent tuit,

Grant parolle an font et grant bruit,

Ne sevent entr'als toz jugier

Lo quel an doie plus prisier.

Quant ont lo mantel esgarde

795

A grant mervoille l'ont loe,

Et, revoient lo vestement,

Lo mantel tindrent a noient,

Et quant la nosche vint apref,

Tot l'autre ne prisent un ef.

800

La raine les anvoia

An sa chambre, puis apela

L'anfant, qui a son pere vint;

Acola lo, soef lo tint,

Molt lo baisa estroitement.

805

El se maine molt malement:

Molt fait que fole qui l'atoche

Envers son vis ne a sa boche:

Venus i ot sa flame mise.

Dido l'estraint, qui est esprise;

810

Mortal poison la dame boit,

De son grant duel ne s'apercoit;

O le baisier tel rage prent

D'amor que li cors li esprent.

Donc lo rebaisa Eneas

815

Et donc Dido aneslopas;

De l'un an l'altre anbat l'amor

Chascuns en boit bien a son tor;

Qui plus le bese plus an boit.

C'est Dido qui plus fole estoit,

820

Ele i a pris mortal ivrece;

Ja l'a amor en grant destrece.

Tant a la raine antandu

A lui baisier, que tot nuit fu

Et que terme fus de soper;

825

Atant fist l'an l'eve corner,

Et puis sont asis au mangier.

Enuiz seroit a desraisnier

Et d'aconter trestoz les mes,

Qui sovent vindrent et espes,

830

Et a nomer vins et herbez,

Mais chascuns an i ot asez;

Molt les a l'an toz bien serviz,

Et quant li mangiers fu failliz,

Les napes praistrent li serjant.

835

El pales o clarte molt grant;

Tant i art cierges, ja par jor

Lumiere ne aust greignor.

Dido remest au mestre dois;

N'i ot se barons non de prois;

840

L'autre mesnie est departie;

Son oste prie qu'il li die

De Troie la destrucion,

Et li recont la traison.

. . . . . . . . .

(lines 845-1196 omitted)

Quant Eneas li recontoit,

La raine se merveilloit

Des mals, des dolors et des pertes

Et des poines qu'il a sofertes.

1200

El lo regardoit par dolcor

Si com la destreingnot Amor;

Amor la point, Amor l'argue,

Sovant sospire et color mue.

Quant il fus termes de colchier,

1205

El fait les liz aparoillier;

An la chanbre l'an a mene

Ou li lit furent apreste

De covertors et de buens dras.

Cil s'est colchiez, qui toz ert las;

1210

La raine fu au covrir, 

A grant pointe s'an pot partir.

Quatre conte l'an on menee;

An sa chanbre s'an est antree;

Cent donzelles i ot de prois,

1215

Filles de contes et de rois;

N'i ot nule, ne fust meschine;

Al colchier servent la raine.

Quant la chanbre fu aserie,

Dame Dido pas ne oblie

1220

Celui por cui li deus d'amor

L'avoit ja mise an grant freor;

De lui comance a penser,

En son corage a recorder

Son vis, sun cors et sa faiture,

1225

Ses diz, ses faiz, sa parleure,

Les batailles que il li dist.

Ne fust por rien qu'ele dormist;

Tornot et retornot sovant,

Eles se pasme et s'estant,

1230

Sofle, sospire et baaille,

Molt se demeine et ravaille,

Tranble, fremist et si tressalt,

Li cuers li mant et se li falt.

Molt est la dame mal baillie,

1235

Et quant ce est qu'ele s'oblie,

Ansanble lui quide gesir,

Antre ses braz tot nu tenir;

Antre ses braz lo quide estraindre.

Ne set s'amor covrir ne foindre;

1240

Ele acole son covertor,

Confort n'i trove ne amor;

Mil foiz baise son oreillier,

Anpor l'amor au chevalier,

Cuide que cil qui ert absenz

1245

Anz an son lit li fust presenz:

N'an i a mie, aillors estoit.

Parolle o lui com s'el l'ooit;

An son lit le taste et quiert;

Quant nel trove, des poinz se fiert;

1250

Ele plore et fait grant duel,

Des larmes moillent si lincuel;

Molt se detorne la raine,

Primes adanz et puis sovine.

Ne puet garir, molt se demeine,

1255

Molt traist la nuit e mal et poine;

Al se demaine an mainte guise.

Ele ne set qui l'a sorprise:

Mortel poison avoit beu;

El ne sot qui li enfes fu

1260

Qu'ele ot tenu et acole,

Qui la rage li ot done.

Ne puet muer ne li enuit

Ce que tant a dure la nuit;

Ja ne cuide le jor veor.

1265

Des que le puet apercevoir,

El fil de l'aube, s'est levee;

N'i ot chanberiere apelee,

Ne fame nule a son servise.

De mortel rage estoit esprise,

1270

Molt l'angoissot li fous d'amor.

El vint errant a sa seror.

'Anna, ge muir, ne vivrai, suer.'

'Que avez donc?' 'Falt me li cuer.'

'Avez vos mal?' 'Tote sui saine.'

1274a

'Que avez donc?' 'D'amor sui vaine;

1274b

Nel puis celer, ge aim.' 'Et qui?'

1275

'Gel te dirai; par foi, celui....'

Et quant ele lo dut nomer,

Si se pasma, ne pot parler.

Quant el revint de pasmeison,

Si recomence sa raison:

1280

'Celui qui a sofert tant mals,

Ce est li Troiens vasaus,

Que fortune a a essil mis

Et qui vinte ier an cest pais;

Ge cuit qu'il est de halt parage

1285

Et de celestial linage;

Del tot pert bien qu'il est gentiz,

Et molt par est cortois ses fiz;

De lui tenir ne de beisier

Ne me poi er soir sazier.

1290

Onc puis que ge tornai de Tire,

Que Sicheus fu morz, mes sire,

Ne me sovint de nule amor,

Desi que vint a icel jor;

Ne vi home de nul aage,

1295

Tant fust riche ne proz ne sage,

Cui ge mostrasse puis sanblant

De cest androit ne tant ne quant,

Fors sol cestui, que destinee

A amene an ma contree;

1300

Cist a espris le mien corage,

Cist m'a done ja mortel rage,

Par cestui muir tot a estros.

Se por ce non qu'a mon espos

Pramis m'amor a mon vivant,

1305

De lui feisse mun amant;

Mais quant je l'ai celui donee,

Ja par cestui n'iert violee;

Miauz voil morir que ge li ment,

Que an autre mete m'antante;

1310

Garder li voil et tenir foi.

Aincois parte terre soz moi

Et tote vive me transglote,

O feus del ciel m'arde trestote,

Que ge autre doigne m'amor,

1315

Que ge promis a mon seignor;

Ge li donai, si l'ot et ait,

Ne l'an sera par moi tort fait;

Ge n'ai besoing d'autrui amer,

Que qu'il m'en estuisse andurer.

1320

Ge n'ai que faire de cestui;

1320a

Onc nel vi mes ne nel conui,

1320b

Fors tant qu'en ai oi parler.

Eneas l'ai oi nomer....'

Quant l'an sovint, qu'el lo noma,

Ele nerci, si se pasma;

Por po que ele ne fu morte.

1325

Anna, sa suer, la reconforte:

'Dame, por coi morez a honte?

Ceste amistie rien ne vos monte,

Qu'avez anvers vostre seignor:

Morz est, ja a passe maint jor.

1330

A duel ussez vostre jovante,

An lui n'a mes negune atante,

De lui n'avroiz vos mes anfant

Ne dolce amor ne bel sanblant,

Ne garantie ne secors.

1335

Molt a ici foles amors.

Quant bien ja mes ne vos puet faire,

Por coi volez por lui mal traire?

Ja mes n'avroiz nul bien del mort:

Faites del vif vostre deport;

1340

El mort n'a mais recovrement:

Faites del vif vostre talent.

Fous est qui por mort si consire;

Sai que est voir, et si l'oi dire:

Tenir estuet lo mort al mort,

1345

Lo vif al vif, co est confort.

Qui maintenra vostre cite,

Vostre terre, vostre erite?

Ne puet estre longue par fenne

Bien maintenu enor ne regne;

1350

Pou fait an son comandement,

S'il n'a altre maintenement;

Ne puet mie grant fes sofrir,

S'il li covient guerre baillir.

Molt par a ci estrange terre;

1355

De totes parz vos coite guerre;

Toz les barons de cest pais

Avez vos fait voz enemis,

Car ne deignastes a seignor

Home de tote ceste enor;

1360

Euz les avez an vilte;

Por ce vos ont coillie an he,

Acoillent vos de mainte part,

Confondront vos ou tost ou tart.

Quant aame avez cestui,

1365

Vostre seignor fetes de lui;

Maintandra vos a grant enor,

Car il est molt de grant valor.

Por vostre bien, ge vos plevis,

L'amena Deus an cest pais;

1370

Quant de s'amor estes sorprise,

Quidiez la veintre an nule guise?

Vos ne poez ancontre Amor.

Se cestui prenez a seignor,

Molt en croistra vostra barnage,

1375

Escauciee an ert Cartage.

Dire poez, por covrir vos,

Cest tens d'iver sejort o nos

Et ses nes face rafermer,

Car n'est or tans de passer mer,

1380

Si lo poez bien retenir,

Anpres faire vostre pleisir.'

Bien ert la dame aincois esprise,

Et sa suer l'a an graignor mise;

D'amor estoit bien enflamee,

1385

Plus l'an a ceste antalantee:

Confortee l'a malemant;

S'el ne l'eust onc an talant

Et ne l'eust onques ame,

Se li a ceste amoneste.

1390

D'amor se desve la raine,

Elle ne cesse ne ne fine.

Lo Troien prent par la main,

De s'amor n'ert ancor certain;

Demeine lo par la cite,

1395

Se li mostre sa richete

Et son chastel et son pales.

El ne puet estre une ore an pes,

Et l'araisone molt sovant

De mil choses dont lui n'apant;

1400

El ne queroit, fors acheison

Eust de lui metre a raison.

Mil foiz li demande une chose,

El ne fine n'el ne repose;

Anmi son conte s'arestait,

1405

Ne set qu'el dit ne qu'ele fait;

Tot pert le sens et la parole,

Amor l'a fait de sage fole;

Molt soloit bien terre tenir

Et bien soloit guerre baillir,

1410

Or a tot mis an nonchaloir

Et an obli par non savoir.

Amors li a fait oblier

Terre a tenir et a garder.

Si enemi gastent sa terre,

1415

El ne prise plus pais que querre,

De nule rien mes ne li chalt,

Ne mes d'amor qui molt l'asalt,

Et molt a mes tote sa gent

Par li malves maintenement;

1420

De li n'ont force ne secors,

Ne montent mes es murs n'es tors,

De l'ovrer n'est conte tenu,

Pandent li mur antrerompu,

An un leu halt, an autre bas:

1425

Tot a perdu por Eneas.

A nonchaloir a mis lo regne,

El n'a home qui ne se plaigne;

Abaissie sunt li Tirien

An por l'ostage al Troien;

1430

Cele qui maintenoit l'onor

A tot guerpi por soe amor.

An tel travail et en tel poine

Fu la raine une semaine;

Ne nuit ne jor ne ot repos,

1435

Ne por dormir ne ot l'oil clos.

En dolor ert et en grant mal;

Al ne sot dire al vasal;

Ne garra mes ansi lonc tens,

Se al ne prent autre porpens:

1440

Ou li an estovra morir

Ou als vasal s'amor gehir.

Cele angoisse a lonc tans sofert,

Qu'el ne l'osot dire an apert.

A un matin formant li plest

1445

Qu'ira chacier an la forest,

Por esbatre de sa dolor,

S'antroblier porroit s'amor;

Car amors est molt plus gries chose,

Quant an loisonje et repose,

1450

Et qui s'an velt bien delivrer,

Si ne doit mie reposer;

Se l'en s'en velt bien esloignier,

Autre antante li a mestier,

Car quant an antant autre part,

1455

Se li sovient d'amor plus tart.